qalb tera ho chuka hai qash qash

qalb terā ho chukā hai qaash qaash

tū faqat ab baiTh kar sapne tarāsh

be-dilī uktāhaTeñ aur ḳhāmushī

ab na koī iztirāb o irti'āsh

uñgliyāñ uThne lagīñ kirdār par

bhuul kyā tujh se huī hai koī faash

dāman-e-shab ke sitāroñ alvidā'

merī bechainī chhupāte tum hī kaash

yuuñ barahna hai siyāsat aaj kī

haiñ musallat masnadoñ par bad-qimāsh

zabt-e-ḳhuddārī muravvat ab kahāñ

bas hai dāman-gīr ik fikr-e-ma'āsh

manziloñ kī samt uTThe jab kabhī

raah ke patthar hue haiñ paash paash

phuul chehra ḳhushbuoñ kā mustaqar

zulf ambar jism sonā ḳhair-bāsh

muñh tirā utrā huā hai kyoñ 'kamāl'

dāstāñ sun lī koī kyā dil-ḳharāsh

qalb tera ho chuka hai qash qash

tu faqat ab baiTh kar sapne tarash

be-dili uktahaTen aur KHamushi

ab na koi iztirab o irti'ash

ungliyan uThne lagin kirdar par

bhul kya tujh se hui hai koi fash

daman-e-shab ke sitaron alwida'

meri bechaini chhupate tum hi kash

yun barahna hai siyasat aaj ki

hain musallat masnadon par bad-qimash

zabt-e-KHuddari murawwat ab kahan

bas hai daman-gir ek fikr-e-ma'ash

manzilon ki samt uTThe jab kabhi

rah ke patthar hue hain pash pash

phul chehra KHushbuon ka mustaqar

zulf ambar jism sona KHair-bash

munh tera utra hua hai kyon 'kamal'

dastan sun li koi kya dil-KHarash