qarār par na milo iztirāb ho ki na ho
sharāb ġhair ko do dil kabāb ho ki na ho
phañsā hai jis ke ġham-o-pech meñ hamārā dil
vo zulf ġhair chhue pech-o-tāb ho ki na ho
gulābī āñkhoñ se saaqī kī dil bache kyūñkar
sharābiyoñ meñ jo baiThe ḳharāb ho ki na ho
kahāñ tak ashk se aa.e na bū-e-dāġh-e-jigar
araq guloñ kā jo khīñcho gulāb ho ki na ho
kamāl kyoñ ki na ho dil ko kāhish-e-ġham meñ
hilāl jab ki huā māhtāb ho ki na ho
vo maah mahr se aa.e to rashk kyā ai charḳh
kabhī qirān-e-mah-o-āftāb ho ki na ho
shuā-e-mahr kī sūrat hai tāb-e-āriz-e-yār
nazar Thahar nahīñ saktī naqāb ho ki na ho
gayā jo tālib-e-chāh-e-zakan dil-e-betāb
kuñ.eñ pe tishna-lab aatā hai aab ho ki na ho
agarche dil nahīñ lekin maiñ aaheñ bhartā huuñ
sabaq to nok-e-zabāñ hai kitāb ho ki na ho
na bosa-e-lab-e-jāñ-baḳhsh do jo kar ke savāl
to zindagānī se goyā javāb ho ki na ho
'nasīm' ġhuncha-dahānoñ se bosa kyoñ māñgā
karo jo baat hī aisī itaab ho ki na ho
qarar par na milo iztirab ho ki na ho
sharab ghair ko do dil kabab ho ki na ho
phansa hai jis ke gham-o-pech mein hamara dil
wo zulf ghair chhue pech-o-tab ho ki na ho
gulabi aankhon se saqi ki dil bache kyunkar
sharabiyon mein jo baiThe KHarab ho ki na ho
kahan tak ashk se aae na bu-e-dagh-e-jigar
araq gulon ka jo khincho gulab ho ki na ho
kamal kyon ki na ho dil ko kahish-e-gham mein
hilal jab ki hua mahtab ho ki na ho
wo mah mahr se aae to rashk kya ai charKH
kabhi qiran-e-mah-o-aftab ho ki na ho
shua-e-mahr ki surat hai tab-e-ariz-e-yar
nazar Thahar nahin sakti naqab ho ki na ho
gaya jo talib-e-chah-e-zakan dil-e-betab
kunen pe tishna-lab aata hai aab ho ki na ho
agarche dil nahin lekin main aahen bharta hun
sabaq to nok-e-zaban hai kitab ho ki na ho
na bosa-e-lab-e-jaan-baKHsh do jo kar ke sawal
to zindagani se goya jawab ho ki na ho
'nasim' ghuncha-dahanon se bosa kyon manga
karo jo baat hi aisi itab ho ki na ho
Source:
Deewan-e-Naseem (Pg. 23)
-
Author:
Pandit Daya Shankar Naseem Lakhnawi
-
- Publisher: Matba Gulshan-e-Faiz, Lucknow
- Year of Publication: 1895
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.