qarib tum the shikayat tumhin se hona thi

qarīb tum the shikāyat tumhīñ se honā thī

ai shahr-e-dard mohabbat tumhīñ se honā thī

tumhārī jang isī sarzamīñ se honā thī

hazār haif mirī gul-zamīñ se honā thī

vo ek qatra ki jo ābgīn-sūrat thā

hamārī baat usī ābgīñ se honā thī

ye ne.amateñ mire ḳhvānoñ kī kis tarah utrīñ

ki merī baat to nān-e-javīñ se honā thī

gumān-o-vaham ke pahlū meñ kyoñ rahe zinda

ye guftugū mirī rūh-ul-amīñ se honā thī

kareñ jo aah to kyūñkar kareñ ki āḳhir-kār

vo ibtidā to kahīñ nā kahīñ se honā thī

na āb-o-dāna kā shikva na shikva-e-shab-o-roz

par ek jang to masnad-nashīñ se honā thī

visāl-o-hijr bhī us kī atā usī kā karam

usī kī baat usī dil-nashīñ se honā thī

qarib tum the shikayat tumhin se hona thi

ai shahr-e-dard mohabbat tumhin se hona thi

tumhaari jang isi sarzamin se hona thi

hazar haif meri gul-zamin se hona thi

wo ek qatra ki jo aabgin-surat tha

hamari baat usi aabgin se hona thi

ye neamaten mere KHwanon ki kis tarah utrin

ki meri baat to nan-e-jawin se hona thi

guman-o-waham ke pahlu mein kyon rahe zinda

ye guftugu meri ruh-ul-amin se hona thi

karen jo aah to kyunkar karen ki aaKHir-kar

wo ibtida to kahin na kahin se hona thi

na aab-o-dana ka shikwa na shikwa-e-shab-o-roz

par ek jang to masnad-nashin se hona thi

visal-o-hijr bhi us ki ata usi ka karam

usi ki baat usi dil-nashin se hona thi