qarya-e-jaan muztarib to hai magar KHamosh hai

qarya-e-jāñ muztarib to hai magar ḳhāmosh hai

yaad chaukhaT par khaḌī hai aur ghar ḳhāmosh hai

ek be-chehra badan ko naam dene ke liye

chaak sargarm-e-‘amal hai kūza-gar ḳhāmosh hai

dil kī vo āvāz jis ko sun ke vo palTā na thā

vo sadā ab bhī havā ke dosh par ḳhāmosh hai

kar ga.e hijrat parinde jis kī shāḳh-e-sabz se

aaj tak raste meñ vo tanhā shajar ḳhāmosh hai

aas meñ kis kī darīcha jāgtā hai raat bhar

ik diyā kis ke liye yuuñ baam par ḳhāmosh hai

muntazir hai kis kī aahaT kī ye pagDanDī 'ġhazal'

kis kī ḳhātir duur tak ye rah-guzar ḳhāmosh hai

qarya-e-jaan muztarib to hai magar KHamosh hai

yaad chaukhaT par khaDi hai aur ghar KHamosh hai

ek be-chehra badan ko nam dene ke liye

chaak sargarm-e-‘amal hai kuza-gar KHamosh hai

dil ki wo aawaz jis ko sun ke wo palTa na tha

wo sada ab bhi hawa ke dosh par KHamosh hai

kar gae hijrat parinde jis ki shaKH-e-sabz se

aaj tak raste mein wo tanha shajar KHamosh hai

aas mein kis ki daricha jagta hai raat bhar

ek diya kis ke liye yun baam par KHamosh hai

muntazir hai kis ki aahaT ki ye pagDanDi 'ghazal'

kis ki KHatir dur tak ye rah-guzar KHamosh hai