qarya-e-jaan se ho kar guzarta tha jo rasta ya-aKHi

qarya-e-jāñ se ho kar guzartā thā jo rāsta yā-aḳhī

ek saaya bahut der us par Tahaltā rahā yā-aḳhī

apne hī aap se der tak ham bhī dast-o-garebāñ rahe

dhund chhaTne lagī aur sūraj nikalne lagā yā-aḳhī

nā-rasā.ī kā ehsās bhī darmiyān-e-yaqīñ aa gayā

chand qadmoñ pe manzil thī aur rāsta kho gayā yā-aḳhī

ham ki abr-e-karam kī tamanna meñ dasht-o-jabal tak ga.e

ek tūfāñ ġhubār-āshnā kar gayā thā fazā yā-aḳhī

ab to jaañ tak utarne lagā ḳhud-kalāmī kā dukh kyā kaheñ

itnā āsāñ nahīñ apne hī aap se bolnā yā-aḳhī

jis ke hāthoñ meñ Daale hue haath phirte the ham rāt-din

kyā tumheñ yaad hai tum batāo ki vo kaun thā yā-aḳhī

ḳhud-farebī hī is 'ahd meñ zinda rahne kā sāmān hai

mar hī jaa.eñ agar chhoḌ deñ ḳhvāb kā dekhnā yā-aḳhī

qarya-e-jaan se ho kar guzarta tha jo rasta ya-aKHi

ek saya bahut der us par Tahalta raha ya-aKHi

apne hi aap se der tak hum bhi dast-o-gareban rahe

dhund chhaTne lagi aur suraj nikalne laga ya-aKHi

na-rasai ka ehsas bhi darmiyan-e-yaqin aa gaya

chand qadmon pe manzil thi aur rasta kho gaya ya-aKHi

hum ki abr-e-karam ki tamanna mein dasht-o-jabal tak gae

ek tufan ghubar-ashna kar gaya tha faza ya-aKHi

ab to jaan tak utarne laga KHud-kalami ka dukh kya kahen

itna aasan nahin apne hi aap se bolna ya-aKHi

jis ke hathon mein Dale hue hath phirte the hum raat-din

kya tumhein yaad hai tum batao ki wo kaun tha ya-aKHi

KHud-farebi hi is 'ahd mein zinda rahne ka saman hai

mar hi jaen agar chhoD den KHwab ka dekhna ya-aKHi