qarz ki mohlat guzar gai hai

qarz kī mohlat guzar ga.ī hai

bhaa.ī muddat guzar ga.ī hai

vasl ke da.avedār kaho kyā

hijr kī iddat guzar ga.ī hai

ham to aise rone lage haiñ

jaise mohabbat guzar ga.ī hai

dasht-e-junūñ! majnūñ ke ġham meñ

kyā be-vahshat guzar ga.ī hai

ishq se be-parvā logoñ kī

umr salāmat guzar ga.ī hai

ai kuffār-e-tishna-badnāñ

shab-e-jahālat guzar ga.ī hai

ghuur añdhere meñ parchhā.īñ

kar ke harakat guzar ga.ī hai

dil se hasrat kā jaanā thā

aañkh se hairat guzar ga.ī hai

'shafaq'! mahūrat ke chakkar meñ

sā.at-e-hijrat guzar ga.ī hai

qarz ki mohlat guzar gai hai

bhai muddat guzar gai hai

wasl ke dawedar kaho kya

hijr ki iddat guzar gai hai

hum to aise rone lage hain

jaise mohabbat guzar gai hai

dasht-e-junun! majnun ke gham mein

kya be-wahshat guzar gai hai

ishq se be-parwa logon ki

umr salamat guzar gai hai

ai kuffar-e-tishna-badnan

shab-e-jahaalat guzar gai hai

ghur andhere mein parchhain

kar ke harakat guzar gai hai

dil se hasrat ka jaana tha

aankh se hairat guzar gai hai

'shafaq'! mahurat ke chakkar mein

saat-e-hijrat guzar gai hai