qatra-e-ab ko kab tak meri dharti tarse

qatra-e-āb ko kab tak mirī dhartī tarse

aag lag jaa.e samundar meñ to paanī barse

surḳh miTTī kī ridā oḌhe hai kab se ākāsh

na shafaq phūle na rim-jhim kahīñ bādal barse

ham ko khīñche liye jaate haiñ sarāboñ ke bhañvar

jaane kis vaqt meñ ham log chale the ghar se

kis kī dahshat hai ki parvāz se ḳhā.if haiñ tuyūr

qumriyāñ shor machātī nahīñ kis ke Dar se

chār-sū kūcha-o-bāzār meñ mahshar hai bapā

ḳhauf se log nikalte nahīñ apne ghar se

muḌ ke dekhā to hameñ chhoḌ ke jaatī thī hayāt

ham ne jaanā thā koī bojh girā hai sar se

qatra-e-ab ko kab tak meri dharti tarse

aag lag jae samundar mein to pani barse

surKH miTTi ki rida oDhe hai kab se aakash

na shafaq phule na rim-jhim kahin baadal barse

hum ko khinche liye jate hain sarabon ke bhanwar

jaane kis waqt mein hum log chale the ghar se

kis ki dahshat hai ki parwaz se KHaif hain tuyur

qumriyan shor machati nahin kis ke Dar se

chaar-su kucha-o-bazar mein mahshar hai bapa

KHauf se log nikalte nahin apne ghar se

muD ke dekha to hamein chhoD ke jati thi hayat

hum ne jaana tha koi bojh gira hai sar se