qayamat hai jo aise par dil-e-ummid-war aae

qayāmat hai jo aise par dil-e-ummīd-vār aa.e

jise va.ade se nafrat ho jise milne se aar aa.e

mirī be-tābiyāñ chhā jaa.eñ yā-rab un kī tamkīñ par

taḌaptā dekh luuñ āñkhoñ se jab mujh ko qarār aa.e

miTā duuñ apnī hastī ḳhaak kar duuñ apne-āpe ko

mirī bātoñ se gar dushman ke bhī dil meñ ġhubār aa.e

ijāzat māñgtī hai duḳht-e-raz mahfil meñ aane kī

mazā ho shaiḳh-sāhib kah uTheñ be-iḳhtiyār aa.e

ḳhudā jaane ki vo 'beḳhud' se itne bad-gumāñ kyuuñ haiñ

ki har jalse meñ farmāte haiñ dekho hoshiyār aa.e

qayamat hai jo aise par dil-e-ummid-war aae

jise wade se nafrat ho jise milne se aar aae

meri be-tabiyan chha jaen ya-rab un ki tamkin par

taDapta dekh lun aankhon se jab mujh ko qarar aae

miTa dun apni hasti KHak kar dun apne-ape ko

meri baaton se gar dushman ke bhi dil mein ghubar aae

ijazat mangti hai duKHt-e-raz mahfil mein aane ki

maza ho shaiKH-sahib kah uThen be-iKHtiyar aae

KHuda jaane ki wo 'beKHud' se itne bad-guman kyun hain

ki har jalse mein farmate hain dekho hoshiyar aae