qayamat hai sar-e-baalin wo zulfon ka bikhar jaana

qayāmat hai sar-e-bālīñ vo zulfoñ kā bikhar jaanā

mirī āshuftagī par un ke chehre kā utar jaanā

ḳhud apne saaye se vo har qadam par un kā Dar jaanā

aur is mā'sūmiyat par sādgī par merā mar jaanā

ba'īd-e-maslahat hai ġham meñ yuuñ ghul ghul ke mar jaanā

ki dekhā hai havādis meñ se kashtī kā guzar jaanā

paḌegī phir koī uftād phir aañsū ravāñ hoñge

na.e tūfān kī aamad hai dariyā kā utar jaanā

lab-e-sāhil ko bosa de ke yuuñ Duubī mirī kashtī

kisī kā jis tarah haañ kah ke phir jaanā mukar jaanā

nizām-e-zindagī kuchh aise ajzā se murattab hai

ki nā-mumkin sā hai shīrāza-e-ġham kā bikhar jaanā

lab-e-bām āftāb aaya to ġhaflat se naqāb uTThī

baḌī muddat meñ ham ne maqsad-e-nūr-e-sahar jaanā

nazar vaale haqīqat se kabhī munkir nahīñ hote

ham aisoñ ne hamesha zindagī ko dard-e-sar jaanā

javānī bad-gumāñ hotī hai lekin is qadar 'bismil'

ki ā.īne meñ apne rū-barū hote hī Dar jaanā

qayamat hai sar-e-baalin wo zulfon ka bikhar jaana

meri aashuftagi par un ke chehre ka utar jaana

KHud apne saye se wo har qadam par un ka Dar jaana

aur is ma'sumiyat par sadgi par mera mar jaana

ba'id-e-maslahat hai gham mein yun ghul ghul ke mar jaana

ki dekha hai hawadis mein se kashti ka guzar jaana

paDegi phir koi uftad phir aansu rawan honge

nae tufan ki aamad hai dariya ka utar jaana

lab-e-sahil ko bosa de ke yun Dubi meri kashti

kisi ka jis tarah han kah ke phir jaana mukar jaana

nizam-e-zindagi kuchh aise ajza se murattab hai

ki na-mumkin sa hai shiraaza-e-gham ka bikhar jaana

lab-e-baam aaftab aaya to ghaflat se naqab uTThi

baDi muddat mein hum ne maqsad-e-nur-e-sahar jaana

nazar wale haqiqat se kabhi munkir nahin hote

hum aison ne hamesha zindagi ko dard-e-sar jaana

jawani bad-guman hoti hai lekin is qadar 'bismil'

ki aaine mein apne ru-baru hote hi Dar jaana