qaza ho sar pe magar zindagi ki baaten hon

qazā ho sar pe magar zindagī kī bāteñ hoñ

nahīñ hai ishq magar āshiqī kī bāteñ hoñ

charāġh kī tarah jalte raho zamāne meñ

jahāñ bhī jaao vahāñ raushnī kī bāteñ hoñ

tum apne dil ko munavvar karo mohabbat se

vahāñ na baiTho jahāñ tīrgī kī bāteñ hoñ

ham apne saare ġhamoñ ko bhulā ke baiThe haiñ

hamāre sāmne bas ab ḳhushī kī bāteñ hoñ

hayāt aisī guzāro amal ke maidāñ meñ

tumhāre ba.ad faqat bandagī kī bāteñ hoñ

'turāb' zauq-e-samā.at nahīñ hai logoñ meñ

ab un ke sāmne kyā shā.irī kī bāteñ hoñ

qaza ho sar pe magar zindagi ki baaten hon

nahin hai ishq magar aashiqi ki baaten hon

charagh ki tarah jalte raho zamane mein

jahan bhi jao wahan raushni ki baaten hon

tum apne dil ko munawwar karo mohabbat se

wahan na baiTho jahan tirgi ki baaten hon

hum apne sare ghamon ko bhula ke baiThe hain

hamare samne bas ab KHushi ki baaten hon

hayat aisi guzaro amal ke maidan mein

tumhaare baad faqat bandagi ki baaten hon

'turab' zauq-e-samaat nahin hai logon mein

ab un ke samne kya shairi ki baaten hon