qismat ko apne likkhe ke tain kaun dho sake

qismat ko apne likkhe ke ta.iiñ kaun dho sake

sab ho sake va-lek ye itnā na ho sake

phūloñ kī sej us ke liye farsh-e-ḳhār hai

tujh bin kisī tarah tirā āshiq na ho sake

tujh bin na kar sake mai-e-ishrat se halq tar

ḳhūñ-nāb-e-ġham se lab tirā āshiq na ho sake

gar chāhe gulshan-e-dil-e-pur-dāġh kī bahār

tū tuḳhm-e-ashk jitne ki ai diida bo sake

dekhā asar tumhārā bhī ai chashm-e-ashk-bār

kuchh kar sake na us kā ghar apnā Dubo sake

dil kī havas nikāl leñ āh-o-fuġhāñ bhī aap

ye bhī na darguzar kareñ jo un se ho sake

na.iiñ jān-o-dil ke khone 'jahāñdār' ko dareġh

yaad us kī par na jān-o-dil apne se kho sake

qismat ko apne likkhe ke tain kaun dho sake

sab ho sake wa-lek ye itna na ho sake

phulon ki sej us ke liye farsh-e-KHar hai

tujh bin kisi tarah tera aashiq na ho sake

tujh bin na kar sake mai-e-ishrat se halq tar

KHun-nab-e-gham se lab tera aashiq na ho sake

gar chahe gulshan-e-dil-e-pur-dagh ki bahaar

tu tuKHm-e-ashk jitne ki ai dida bo sake

dekha asar tumhaara bhi ai chashm-e-ashk-bar

kuchh kar sake na us ka ghar apna Dubo sake

dil ki hawas nikal len aah-o-fughan bhi aap

ye bhi na darguzar karen jo un se ho sake

nain jaan-o-dil ke khone 'jahandar' ko daregh

yaad us ki par na jaan-o-dil apne se kho sake