qismat se laḌtī haiñ nigāheñ
tere hote kis ko chāheñ
ulTī dekheñ ishq kī rāheñ
hañsnā paḌe jab ronā chāheñ
ishrat-e-māzī ko rotā huuñ
ġham ke gale meñ Daal ke bāheñ
nāzuk nāzuk jazbe dil ke
halkī halkī ThanDī aaheñ
shīsha-e-dil ke har TukḌe meñ
ek ik sūrat kis ko chāheñ
mere muqaddar ke sar-nāme
jalte aañsū ThanDī aaheñ
dukhte hue dil kī rag rag meñ
tum chuTkī lo ham na karāheñ
haa.e tire pāband-e-mohabbat
qaidī aañsū mujrim aaheñ
ek ik saañs javāb-talab hai
kaise naale kaisī aaheñ
kyā na guzartī hogī dil par
ro na sakeñ jab ronā chāheñ
surḳh āñkheñ haiñ bhare haiñ aañsū
kis se 'sirāj' laḌī haiñ nigāheñ
qismat se laDti hain nigahen
tere hote kis ko chahen
ulTi dekhen ishq ki rahen
hansna paDe jab rona chahen
ishrat-e-mazi ko rota hun
gham ke gale mein Dal ke bahen
nazuk nazuk jazbe dil ke
halki halki ThanDi aahen
shisha-e-dil ke har TukDe mein
ek ek surat kis ko chahen
mere muqaddar ke sar-name
jalte aansu ThanDi aahen
dukhte hue dil ki rag rag mein
tum chuTki lo hum na karahen
hae tere paband-e-mohabbat
qaidi aansu mujrim aahen
ek ek sans jawab-talab hai
kaise nale kaisi aahen
kya na guzarti hogi dil par
ro na saken jab rona chahen
surKH aankhen hain bhare hain aansu
kis se 'siraj' laDi hain nigahen
Source:
Shola-e-Aawaz (Pg. e-106 p-105)
-
Author:
Siraj Lakhnavi
-
- Edition: 1920
- Publisher: Nizami Press, Lucknow
- Year of Publication: 1920
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.