qissa-e-KHak to kuchh KHak se aage tak tha

qissa-e-ḳhāk to kuchh ḳhaak se aage tak thā

giilī miTTī kā safar chaak se aage tak thā

maiñ bashar thā so mire paañv se lipTī thī zamīñ

aur charchā mirā aflāk se aage tak thā

sho.ala-e-ishq ġham-e-hijr sar-e-shahr-e-hujūm

ik garebān thā sad-chāk se aage tak thā

ḳhāmushī karb lahu rañg meñ Duube hue phuul

marhala dīda-e-namnāk se aage tak thā

lauT aayā huuñ yahī dekh ke ik dasht se meñ

ek jubba merī poshāk se aage tak thā

rah ga.iiñ shahr-e-ḳhirad meñ hī ulajh kar socheñ

ik jahāñ aur bhī idrāk se aage tak thā

dast-e-suqrāt pe rakkhe hue pyāle kā amiin

zahr-e-qātil kisī tiryāk se aage tak thā

qissa-e-KHak to kuchh KHak se aage tak tha

gili miTTi ka safar chaak se aage tak tha

main bashar tha so mere panw se lipTi thi zamin

aur charcha mera aflak se aage tak tha

shoala-e-ishq gham-e-hijr sar-e-shahr-e-hujum

ek gareban tha sad-chaak se aage tak tha

KHamushi karb lahu rang mein Dube hue phul

marhala dida-e-namnak se aage tak tha

lauT aaya hun yahi dekh ke ek dasht se mein

ek jubba meri poshak se aage tak tha

rah gain shahr-e-KHirad mein hi ulajh kar sochen

ek jahan aur bhi idrak se aage tak tha

dast-e-suqraat pe rakkhe hue pyale ka amin

zahr-e-qatil kisi tiryak se aage tak tha