qissa-e-zist muKHtasar karte

qissa-e-zīst muḳhtasar karte

kuchh to apnī sī chārāgar karte

maut kī niind so ga.e bīmār

roz kis shaam ko sahar karte

sach hai har naala kyuuñ rasā hotā

mere naale the kyuuñ asar karte

ḳhud vafā kyā vafā kā badla kyā

lutf ehsān thā agar karte

kar liyā tere naam par sajda

ab kahāñ qasd-e-sañg-e-dar karte

aas hotī to is sahāre par

sabr mumkin na thā magar karte

kaash ā.īna haath se rakh kar

tum mire haal par nazar karte

tūl-e-rūdād-e-ġham ma.āz-allāh

umr guzrī hai muḳhtasar karte

ġham ne mohlat na dī ki ham 'fānī'

aur kuchh din abhī basar karte

qissa-e-zist muKHtasar karte

kuchh to apni si chaaragar karte

maut ki nind so gae bimar

roz kis sham ko sahar karte

sach hai har nala kyun rasa hota

mere nale the kyun asar karte

KHud wafa kya wafa ka badla kya

lutf ehsan tha agar karte

kar liya tere nam par sajda

ab kahan qasd-e-sang-e-dar karte

aas hoti to is sahaare par

sabr mumkin na tha magar karte

kash aaina hath se rakh kar

tum mere haal par nazar karte

tul-e-rudad-e-gham maaz-allah

umr guzri hai muKHtasar karte

gham ne mohlat na di ki hum 'fani'

aur kuchh din abhi basar karte