qubul ho gai uski dua to kya hoga

qubūl ho ga.ī us kī duā to kyā hogā

agar vo ban gayā ik din ḳhudā to kyā hogā

zavāl-e-fikr-o-nazar kā ye silsila ik din

shikast-e-fikr-o-nazar ban gayā to kyā hogā

kabhī to pūchhe koī raushnī-faroshoñ se

agar charāġh-e-mohabbat bujhā to kyā hogā

namī makān kī sahmī huī hai mausam se

ghaTā jo ho ga.ī mujh se ḳhafā to kyā hogā

ghanere peḌ ke saa.e meñ hañsne vaale charāġh

jo apne ruḳh ko badal de havā to kyā hogā

ġhazāl zad meñ abhī hai shikār kar le 'fahīm'

nishāna ho gayā phir bevafā to kyā hogā

qubul ho gai us ki dua to kya hoga

agar wo ban gaya ek din KHuda to kya hoga

zawal-e-fikr-o-nazar ka ye silsila ek din

shikast-e-fikr-o-nazar ban gaya to kya hoga

kabhi to puchhe koi raushni-faroshon se

agar charagh-e-mohabbat bujha to kya hoga

nami makan ki sahmi hui hai mausam se

ghaTa jo ho gai mujh se KHafa to kya hoga

ghanere peD ke sae mein hansne wale charagh

jo apne ruKH ko badal de hawa to kya hoga

ghazal zad mein abhi hai shikar kar le 'fahim'

nishana ho gaya phir bewafa to kya hoga