qufl-e-zindan aaj khola jaega

qufl-e-zindāñ aaj kholā jā.egā

laash qaidī kī nikālī jā.egī

aa rahā hai un kā ab 'ahd-e-shabāb

zulm kī buniyād Daalī jā.egī

zindagī bhar ham rahe mahrūm-e-dīd

saath tasvīr-e-ḳhayālī jā.egī

aa rahī hai zulf un kī tā-qadam

kis kamar se ye sañbhālī jā.egī

sajda-gāh-e-'ām hogā un kā dar

qaid masjid kī uThā lī jā.egī

zulm Dhāne vaale ye bhī jaan leñ

āh-e-mazlūmāñ na ḳhālī jā.egī

sajda-e-but se agar rokā gayā

ik na.ī masjid banā lī jā.egī

fasl-e-gul meñ dā'vat-e-pīr-e-muġhāñ

shaiḳh sāhab se na Taalī jā.egī

qufl-e-zindan aaj khola jaega

lash qaidi ki nikali jaegi

aa raha hai un ka ab 'ahd-e-shabab

zulm ki buniyaad Dali jaegi

zindagi bhar hum rahe mahrum-e-did

sath taswir-e-KHayali jaegi

aa rahi hai zulf un ki ta-qadam

kis kamar se ye sanbhaali jaegi

sajda-gah-e-'am hoga un ka dar

qaid masjid ki uTha li jaegi

zulm Dhane wale ye bhi jaan len

aah-e-mazluman na KHali jaegi

sajda-e-but se agar roka gaya

ek nai masjid bana li jaegi

fasl-e-gul mein da'wat-e-pir-e-mughan

shaiKH sahab se na Tali jaegi