qurbaton ke darmiyan bhi fasla baqi raha

qurbatoñ ke darmiyāñ bhī fāsla baaqī rahā

ek isbāt-o-nafī kā silsila baaqī rahā

har duā-e-mustahab kal ke liye rakh dī ga.ī

aur hoñToñ par kasīlā zā.iqa baaqī rahā

pattharoñ kī sab lakīreñ dhīre dhīre miT ga.iiñ

nok-e-mizhgāñ se magar likkhā huā baaqī rahā

manziloñ kī samt roz-o-shab yuuñ hī chalte rahe

rāste kaTte ga.e aur fāsla baaqī rahā

ab safīne kā pata girdāb hī shāyad kahe

nāḳhudā ġhā.eb huā nām-e-ḳhudā baaqī rahā

is qadar chāhā ki us ko de diyā sab kuchh 'shamīm'

phir bhī mere maiñ kā mujh meñ ik nasha baaqī rahā

qurbaton ke darmiyan bhi fasla baqi raha

ek isbaat-o-nafi ka silsila baqi raha

har dua-e-mustahab kal ke liye rakh di gai

aur honTon par kasila zaiqa baqi raha

pattharon ki sab lakiren dhire dhire miT gain

nok-e-mizhgan se magar likkha hua baqi raha

manzilon ki samt roz-o-shab yun hi chalte rahe

raste kaTte gae aur fasla baqi raha

ab safine ka pata girdab hi shayad kahe

naKHuda ghaeb hua nam-e-KHuda baqi raha

is qadar chaha ki us ko de diya sab kuchh 'shamim'

phir bhi mere main ka mujh mein ek nasha baqi raha