rabta hai abhi hawaon se

rābta hai abhī havāoñ se

jī rahā huuñ tirī duāoñ se

zindagī bol kyā irāda hai

maut mahñgī nahīñ davāoñ se

tū mirī laġhzishoñ pe tanz na kar

merī pahchān hai ḳhatāoñ se

is ko saql-e-zamīn kahte haiñ

lauT aayā bashar ḳhalāoñ se

dil ne āñkhoñ meñ bhar diye aañsū

le ke māyūsiyāñ ghaTāoñ se

jitne ḳhāna-ḳharāb haiñ sab ko

bad-duā.eñ milī haiñ maaoñ se

bhiik de varna chhīn le aa kar

kāsa-e-dīd ham gadāoñ se

ai ḳhudā ab to bāl-o-par de de

jism chhupte nahīñ qabāoñ se

ranj-o-ġham hoñ ki hasrat-o-armāñ

mutma.in huuñ tirī atāoñ se

koshisheñ chhoḌ duuñ sabhī 'nusrat'

kaam nikleñ agar duāoñ se

rabta hai abhi hawaon se

ji raha hun teri duaon se

zindagi bol kya irada hai

maut mahngi nahin dawaon se

tu meri laghzishon pe tanz na kar

meri pahchan hai KHataon se

is ko saql-e-zamin kahte hain

lauT aaya bashar KHalaon se

dil ne aankhon mein bhar diye aansu

le ke mayusiyan ghaTaon se

jitne KHana-KHarab hain sab ko

bad-duaen mili hain maon se

bhik de warna chhin le aa kar

kasa-e-did hum gadaon se

ai KHuda ab to baal-o-par de de

jism chhupte nahin qabaon se

ranj-o-gham hon ki hasrat-o-arman

mutmain hun teri ataon se

koshishen chhoD dun sabhi 'nusrat'

kaam niklen agar duaon se