rabte bhi nahin fasla bhi nahin

rābte bhī nahīñ fāsla bhī nahīñ

duur huuñ tujh se lekin judā bhī nahīñ

maut hī se sahī zā.iqe to mile

zindagī meñ to koī maza bhī nahīñ

kis kī āñkhoñ meñ dekheñ mohabbat kā aks

ab to aisā koī ā.īna bhī nahīñ

laakh ġhurbat shikastoñ ke sāmāñ kare

hārne vaalī merī anā bhī nahīñ

chāñd taare chamakte haiñ un ke liye

jin ke ghar raushnī ko diyā bhī nahīñ

umr rahte hue kar lo ishq-o-vafā

ye vo vājib hai jis kī qazā bhī nahīñ

merī ḳhāmoshiyāñ us kī sargoshiyāñ

maiñ ne sab kah diyā aur kahā bhī nahīñ

un kā 'merāj' kaisā ajab tarz hai

be-vafā bhī nahīñ bā-vafā bhī nahīñ

rabte bhi nahin fasla bhi nahin

dur hun tujh se lekin juda bhi nahin

maut hi se sahi zaiqe to mile

zindagi mein to koi maza bhi nahin

kis ki aankhon mein dekhen mohabbat ka aks

ab to aisa koi aaina bhi nahin

lakh ghurbat shikaston ke saman kare

haarne wali meri ana bhi nahin

chand tare chamakte hain un ke liye

jin ke ghar raushni ko diya bhi nahin

umr rahte hue kar lo ishq-o-wafa

ye wo wajib hai jis ki qaza bhi nahin

meri KHamoshiyan us ki sargoshiyan

main ne sab kah diya aur kaha bhi nahin

un ka 'meraj' kaisa ajab tarz hai

be-wafa bhi nahin ba-wafa bhi nahin