raegan ishq ka anjam kahan hota hai

rā.egāñ ishq kā anjām kahāñ hotā hai

ab mirā ġham tire chehre se ayaañ hotā hai

aaj muñh moḌ ke jaane lagīñ yādeñ us kī

aaj tārāj mirā kūcha-e-jāñ hotā hai

gardish-e-vaqt ġhalat niklā tirā andāza

Thokareñ khā ke mirā azm javāñ hotā hai

Tiis jab dil meñ ubhartī hai tirī yādoñ kī

tab kahīñ apne bhī hone kā gumāñ hotā hai

ai falak kyā mujhe dikhlātā hai tū chāñd apnā

is se raushan to mire dil kā dhuāñ hotā hai

aisā tūfān-e-balā-ḳhez hai us kā andāz

be-tanāb aaj mirā ḳhema-e-jāñ hotā hai

āsmāñ vaale haiñ kyoñ mahv-e-samā.at ai 'mujīb'

kaun goyā ye sar-e-nok-e-sināñ hotā hai

raegan ishq ka anjam kahan hota hai

ab mera gham tere chehre se ayan hota hai

aaj munh moD ke jaane lagin yaaden us ki

aaj taraj mera kucha-e-jaan hota hai

gardish-e-waqt ghalat nikla tera andaza

Thokaren kha ke mera azm jawan hota hai

Tis jab dil mein ubharti hai teri yaadon ki

tab kahin apne bhi hone ka guman hota hai

ai falak kya mujhe dikhlata hai tu chand apna

is se raushan to mere dil ka dhuan hota hai

aisa tufan-e-bala-KHez hai us ka andaz

be-tanab aaj mera KHema-e-jaan hota hai

aasman wale hain kyon mahw-e-samaat ai 'mujib'

kaun goya ye sar-e-nok-e-sinan hota hai