rah bhaTka hua insan nazar aata hai

raah bhaTkā huā insān nazar aatā hai

terī āñkhoñ meñ to tūfān nazar aatā hai

paas se dekho to ma.alūm paḌegā tum ko

kaam bas duur se āsān nazar aatā hai

is ko ma.alūm nahīñ apne vatan kī sarhad

ye parinda abhī nādān nazar aatā hai

bas vahī bhūmī pe insān hai kahne laa.eq

jis ko har shaḳhs meñ bhagvān nazar aatā hai

aa.ī jis roz se beTī pe javānī us kī

baap har vaqt pareshān nazar aatā hai

jab se tum chhoḌ ga.e mujh ko akelā 'amabar'

shahr saarā mujhe vīrān nazar aatā hai

rah bhaTka hua insan nazar aata hai

teri aankhon mein to tufan nazar aata hai

pas se dekho to malum paDega tum ko

kaam bas dur se aasan nazar aata hai

is ko malum nahin apne watan ki sarhad

ye parinda abhi nadan nazar aata hai

bas wahi bhumi pe insan hai kahne laeq

jis ko har shaKHs mein bhagwan nazar aata hai

aai jis roz se beTi pe jawani us ki

bap har waqt pareshan nazar aata hai

jab se tum chhoD gae mujh ko akela 'amabar'

shahr sara mujhe viran nazar aata hai