rah-e-safar mein chiz koi kya thi mere pas

rāh-e-safar meñ chiiz koī kyā thī mere paas

bas maiñ thā aur vus.at-e-sahrā thī mere paas

thā mere paas ghaTtī huī zindagī kā rañj

aur ek lambī ḳhvāhish-e-duniyā thī mere paas

apnā har ik nazāra dikhānā paḌā use

kartā vo kyā ki chashm-e-tamāshā thī mere paas

tapte hue dinoñ meñ kahīñ thī ḳhunuk havā

aur sardiyoñ meñ aag sī barpā thī mere paas

kyā chiiz thī jo ghultī rahī bahte vaqt meñ

pal pal badaltī rañgat-e-dariyā thī mere paas

kaise bigaḌ ga.ī use kis ne badal diyā

'shāhīñ' jo ek sūrat-e-fardā thī mere paas

rah-e-safar mein chiz koi kya thi mere pas

bas main tha aur wusat-e-sahra thi mere pas

tha mere pas ghaTti hui zindagi ka ranj

aur ek lambi KHwahish-e-duniya thi mere pas

apna har ek nazara dikhana paDa use

karta wo kya ki chashm-e-tamasha thi mere pas

tapte hue dinon mein kahin thi KHunuk hawa

aur sardiyon mein aag si barpa thi mere pas

kya chiz thi jo ghulti rahi bahte waqt mein

pal pal badalti rangat-e-dariya thi mere pas

kaise bigaD gai use kis ne badal diya

'shahin' jo ek surat-e-farda thi mere pas