rah-e-ulfat se pareshan kidhar jata hai

rāh-e-ulfat se pareshān kidhar jaatā hai

apnī manzil se bhī anjān kidhar jaatā hai

jhuuT se haar ke nādān kidhar jaatā hai

maar ke apnā tū īmān kidhar jaatā hai

bik rahā huuñ sar-e-bāzār tirī shartoñ par

de ke mujh ko tū ye nuqsān kidhar jaatā hai

terī yādoñ kā uThā thā jo mire siine se

dekhnā hai ki vo tūfān kidhar jaatā hai

maiñ isī soch meñ uljhī huuñ baḌī muddat se

baa'd marne ke ye insān kidhar jaatā hai

mai-kada bhī hai terā ghar bhī sanam-ḳhāne bhī

āzmānā hai ki ab dhyān kidhar jaatā hai

nekiyāñ chhoḌ ke jis ne jo kamāyā 'mīnā'

dekhiye le ke vo sāmān kidhar jaatā hai

rah-e-ulfat se pareshan kidhar jata hai

apni manzil se bhi anjaan kidhar jata hai

jhuT se haar ke nadan kidhar jata hai

mar ke apna tu iman kidhar jata hai

bik raha hun sar-e-bazar teri sharton par

de ke mujh ko tu ye nuqsan kidhar jata hai

teri yaadon ka uTha tha jo mere sine se

dekhna hai ki wo tufan kidhar jata hai

main isi soch mein uljhi hun baDi muddat se

ba'd marne ke ye insan kidhar jata hai

mai-kada bhi hai tera ghar bhi sanam-KHane bhi

aazmana hai ki ab dhyan kidhar jata hai

nekiyan chhoD ke jis ne jo kamaya 'mina'

dekhiye le ke wo saman kidhar jata hai