rasta mujhse alag tum bhi bana sakte ho

rāsta mujh se alag tum bhī banā sakte ho

tum jo chāho to mujhe chhoḌ ke jā sakte ho

ātish-e-hijr ke sho'loñ ne jalāyā hai mujhe

muskurā kar unheñ gulzār banā sakte ho

bin tumhāre maiñ jiyūñ is se hai behtar marnā

apne hāthoñ se mujhe zahr pilā sakte ho

be-sabab mere masā.ib kā uḌāte ho mazāq

sāmne aao agar aag bujhā sakte ho

dekhne 'ishq kī rusvā.ī ko aa.e haiñ sabhī

ho sake to zarā parda ye uThā sakte ho

dard duniyā kā liye phirte ho 'ahmad' dil meñ

ham ko mā'lūm hai tum ġham bhī chhupā sakte ho

rasta mujh se alag tum bhi bana sakte ho

tum jo chaho to mujhe chhoD ke ja sakte ho

aatish-e-hijr ke sho'lon ne jalaya hai mujhe

muskura kar unhen gulzar bana sakte ho

bin tumhaare main jiyun is se hai behtar marna

apne hathon se mujhe zahr pila sakte ho

be-sabab mere masaib ka uDate ho mazaq

samne aao agar aag bujha sakte ho

dekhne 'ishq ki ruswai ko aae hain sabhi

ho sake to zara parda ye uTha sakte ho

dard duniya ka liye phirte ho 'ahmad' dil mein

hum ko ma'lum hai tum gham bhi chhupa sakte ho