rasta sunsan tha to muD ke dekha kyun nahin

rāsta sunsān thā to muḌ ke dekhā kyuuñ nahīñ

mujh ko tanhā dekh kar us ne pukārā kyuuñ nahīñ

dhuup kī āġhosh meñ leTā rahā maiñ 'umr bhar

mehrbāñ thā vo to misl-e-abr aayā kyuuñ nahīñ

ek panchhī der tak sāhil pe mañDlātā rahā

muztarib thā pyaas se lekin vo utrā kyuuñ nahīñ

qurb kī qaus-e-quzah kamre meñ bikhrī thī magar

raat bhar rang-e-tamannā phir bhī nikhrā kyuuñ nahīñ

mujh ko patthar meñ badalte chāhe ḳhud ban jaate vo mom

ḳhvāhish-e-tifl-e-tamannā ko jagāyā kyuuñ nahīñ

us ko tanhā pā ke 'aslam' raat apne room meñ

qatra-e-ḳhūn-e-havas āñkhoñ meñ aayā kyuuñ nahīñ

rasta sunsan tha to muD ke dekha kyun nahin

mujh ko tanha dekh kar us ne pukara kyun nahin

dhup ki aaghosh mein leTa raha main 'umr bhar

mehrban tha wo to misl-e-abr aaya kyun nahin

ek panchhi der tak sahil pe manDlata raha

muztarib tha pyas se lekin wo utra kyun nahin

qurb ki qaus-e-quzah kamre mein bikhri thi magar

raat bhar rang-e-tamanna phir bhi nikhra kyun nahin

mujh ko patthar mein badalte chahe KHud ban jate wo mom

KHwahish-e-tifl-e-tamanna ko jagaya kyun nahin

us ko tanha pa ke 'aslam' raat apne room mein

qatra-e-KHun-e-hawas aankhon mein aaya kyun nahin