raste phaile hue jitne bhi the patthar ke the

rāste phaile hue jitne bhī the patthar ke the

rāhzan shashdar rahe ḳhud qāfile patthar ke the

narm-o-nāzuk ḳhvāhisheñ kyā ho ga.iiñ ham kyā kahīñ

ārzūoñ kī nadī meñ bulbule patthar ke the

ashk se mahrūm thiiñ āñkheñ fazā-e-shahr kī

jān-o-dil patthar ke the jo ġham mile patthar ke the

har qadam par Thokaroñ meñ zindagī baTtī rahī

aadmī kī raah meñ sab marhale patthar ke the

dil dhaḌak kar chup rahā kal maslahat kī raah par

sar-burīda saikḌoñ uupar tale patthar ke the

regzār-e-zīst meñ soz-e-safar jaatā rahā

yuuñ huā mahsūs jaise aable patthar ke the

lamha lamha sañg ban kar jī rahī thī maiñ 'sadaf'

chāhatoñ ke darmiyāñ jab hausle patthar ke the

raste phaile hue jitne bhi the patthar ke the

rahzan shashdar rahe KHud qafile patthar ke the

narm-o-nazuk KHwahishen kya ho gain hum kya kahin

aarzuon ki nadi mein bulbule patthar ke the

ashk se mahrum thin aankhen faza-e-shahr ki

jaan-o-dil patthar ke the jo gham mile patthar ke the

har qadam par Thokaron mein zindagi baTti rahi

aadmi ki rah mein sab marhale patthar ke the

dil dhaDak kar chup raha kal maslahat ki rah par

sar-burida saikDon upar tale patthar ke the

regzar-e-zist mein soz-e-safar jata raha

yun hua mahsus jaise aable patthar ke the

lamha lamha sang ban kar ji rahi thi main 'sadaf'

chahaton ke darmiyan jab hausle patthar ke the