raat aati hai to taqon mein jalate hain charagh

raat aatī hai to tāqoñ meñ jalāte haiñ charāġh

ḳhvāb zinda haiñ so āñkhoñ meñ jalāte haiñ charāġh

āñdhiyāñ ab hameñ mahsūr kiye baiThī haiñ

ab to ham sirf ḳhayāloñ meñ jalāte haiñ charāġh

Thokareñ khāte hue umr kaTī apnī so ham

dūsroñ ke liye rāhoñ meñ jalāte haiñ charāġh

tanz kartā huā guzrā thā havā kā jhoñkā

tab se ham tez havāoñ meñ jalāte haiñ charāġh

tishna-lab ā.eñge dariyāoñ ke Thukrā.e hue

isī baa.is to sarāboñ meñ jalāte haiñ charāġh

ḳhvāb bikhre haiñ hamāre yahāñ har gaam so ham

shaam hote hī ḳharāboñ meñ jalāte haiñ charāġh

raat aati hai to taqon mein jalate hain charagh

KHwab zinda hain so aankhon mein jalate hain charagh

aandhiyan ab hamein mahsur kiye baiThi hain

ab to hum sirf KHayalon mein jalate hain charagh

Thokaren khate hue umr kaTi apni so hum

dusron ke liye rahon mein jalate hain charagh

tanz karta hua guzra tha hawa ka jhonka

tab se hum tez hawaon mein jalate hain charagh

tishna-lab aaenge dariyaon ke Thukrae hue

isi bais to sarabon mein jalate hain charagh

KHwab bikhre hain hamare yahan har gam so hum

sham hote hi KHarabon mein jalate hain charagh