raat bhar tha main kisi KHwab mein gum

raat bhar thā maiñ kisī ḳhvāb meñ gum

mauj-dar-mauj thā girdāb meñ gum

gahre paanī kā shanāvar thā kabhī

dekhnā ab use pāyāb meñ gum

vajd meñ aa.uuñ to raqsāñ sar-e-bazm

aur kabhī ḳhalvat-e-mehrāb meñ gum

ek fariyād gulū-basta rahī

jaise naġhma kisī mizrāb meñ gum

dar-ba-dar honā muqaddar Thahrā

jab tavakkul huā asbāb meñ gum

ham se hairat kā safar tai na huā

ham ki the manzar-e-nāyāb meñ gum

ḳhushk hoñ āñkheñ to DhūñDeñ tirā aks

tū kahāñ jā ke huā aab meñ gum

raat bhar tha main kisi KHwab mein gum

mauj-dar-mauj tha girdab mein gum

gahre pani ka shanawar tha kabhi

dekhna ab use payab mein gum

wajd mein aaun to raqsan sar-e-bazm

aur kabhi KHalwat-e-mehrab mein gum

ek fariyaad gulu-basta rahi

jaise naghma kisi mizrab mein gum

dar-ba-dar hona muqaddar Thahra

jab tawakkul hua asbab mein gum

hum se hairat ka safar tai na hua

hum ki the manzar-e-nayab mein gum

KHushk hon aankhen to DhunDen tera aks

tu kahan ja ke hua aab mein gum