raat charagh ki mahfil mein shamil ek zamana tha

raat charāġh kī mahfil meñ shāmil ek zamāna thā

lekin saath meñ jalne vaalī raat thī yā parvāna thā

ḳhizar nahīñ rahzan hī hogā raah meñ jis ne luuT liyā

lekin yaaro shak hotā hai kuchh jaanā pahchānā thā

shab-bhar jis rūdād-o-alam par ashk bahāte guzrī thī

sub.h huī to ham ne jaanā apnā hī afsāna thā

kaun hamāre dard ko samjhā kis ne ġham meñ saath diyā

kahne ko to saath hamāre tum kyā ek zamāna thā

log use jo chāheñ kah leñ apnā to ye haal rahā

sirf unhīñ se zaḳhm mile haiñ jin se kuchh yārāna thā

maslahatoñ kī is bastī meñ lab khulte ye taab na thī

vaz-e-junūñ kī baat na pūchho vo bhī ek bahāna thā

talḳhī-e-ġham pahuñche the bhulāne sūd-o-ziyāñ meñ uljhe haiñ

bāda-faroshoñ kī manDī thī naam magar mai-ḳhāna thā

jin kī ḳhātir ham ne apnā zauq-e-talab badnām kiyā

aaj vahī kahte haiñ hañs kar shā.ir thā dīvāna thā

raat charagh ki mahfil mein shamil ek zamana tha

lekin sath mein jalne wali raat thi ya parwana tha

KHizar nahin rahzan hi hoga rah mein jis ne luT liya

lekin yaro shak hota hai kuchh jaana pahchana tha

shab-bhar jis rudad-o-alam par ashk bahate guzri thi

subh hui to hum ne jaana apna hi afsana tha

kaun hamare dard ko samjha kis ne gham mein sath diya

kahne ko to sath hamare tum kya ek zamana tha

log use jo chahen kah len apna to ye haal raha

sirf unhin se zaKHm mile hain jin se kuchh yarana tha

maslahaton ki is basti mein lab khulte ye tab na thi

waz-e-junun ki baat na puchho wo bhi ek bahana tha

talKHi-e-gham pahunche the bhulane sud-o-ziyan mein uljhe hain

baada-faroshon ki manDi thi nam magar mai-KHana tha

jin ki KHatir hum ne apna zauq-e-talab badnam kiya

aaj wahi kahte hain hans kar shair tha diwana tha