raat gae zindan mein jaane kis qaidi ka matam tha

raat ga.e zindāñ meñ jaane kis qaidī kā mātam thā

us kī beḌiyāñ chup chup sī thiiñ aur ujālā kam kam thā

jaane kyuuñ guftār pe us kī vahm-o-gumāñ ke saa.e the

baat to us kī sīdhī sī thī lahja kuchh kuchh mub.ham thā

fasl-e-bahārāñ aa.ī bhī lekin chaak garebāñ ho na sake

jaane diloñ par kyā guzrī thī kaun sā us kā mausam thā

dasht-e-junūñ meñ dhuup kaḌī thī nauha-kunāñ the sannāTe

jaane terī yaad kā bādal saaya fagan kyuuñ paiham thā

soḳhta-sāmāñ dasht-e-talab se lauT ke aa.e to dekhā

saare gharoñ meñ un kā ghar hī itnā darham-barham thā

ḳhauf-o-rajā kā sahn-e-chaman meñ ek hī jaisā haal huā

zikr-e-sho.ala-o-shabnam bhī thā barq-e-fanā kā mātam thā

rāh-e-vafā meñ hirs-o-havā ke itne dilkash manzar the

us meñ 'rāhī' bhaTak gayā vo āḳhir ibn-e-ādam thā

raat gae zindan mein jaane kis qaidi ka matam tha

us ki beDiyan chup chup si thin aur ujala kam kam tha

jaane kyun guftar pe us ki wahm-o-guman ke sae the

baat to us ki sidhi si thi lahja kuchh kuchh mubham tha

fasl-e-bahaaran aai bhi lekin chaak gareban ho na sake

jaane dilon par kya guzri thi kaun sa us ka mausam tha

dasht-e-junun mein dhup kaDi thi nauha-kunan the sannaTe

jaane teri yaad ka baadal saya fagan kyun paiham tha

soKHta-saman dasht-e-talab se lauT ke aae to dekha

sare gharon mein un ka ghar hi itna darham-barham tha

KHauf-o-raja ka sahn-e-chaman mein ek hi jaisa haal hua

zikr-e-shoala-o-shabnam bhi tha barq-e-fana ka matam tha

rah-e-wafa mein hirs-o-hawa ke itne dilkash manzar the

us mein 'rahi' bhaTak gaya wo aaKHir ibn-e-adam tha