raat guzri phir andhera chha gaya

raat guzrī phir añdherā chhā gayā

apnā sūraj din chaḌhe gahnā gayā

ham na jaane kaun aalam meñ rahe

vaqt kaaTā jī na bahlāyā gayā

bas yahī thā un ko patthar dil pe naaz

zulm farmā.eñ taras kyoñ aa gayā

ma.arka-ārā hue the husn-o-ishq

biich meñ dil aa gayā maarā gayā

chaudhvīñ ke chāñd vaalī raat meñ

chāñd niklā thā ki bādal chhā gayā

kyā samajh sakte mohabbat kā fareb

yuuñ to samjhe jis qadar samjhā gayā

ham sar-e-rāh-e-vafā sunte rahe

kah gayā apnī sī har aaya gayā

aane vaalā thā añdherā raat kā

shaam hote duur tak saayā gayā

vaz.a-e-ḳhuddārī nibāhī to magar

ai 'razā' dāñtoñ pasīna aa gayā

raat guzri phir andhera chha gaya

apna suraj din chaDhe gahna gaya

hum na jaane kaun aalam mein rahe

waqt kaTa ji na bahlaya gaya

bas yahi tha un ko patthar dil pe naz

zulm farmaen taras kyon aa gaya

marka-ara hue the husn-o-ishq

bich mein dil aa gaya mara gaya

chaudhwin ke chand wali raat mein

chand nikla tha ki baadal chha gaya

kya samajh sakte mohabbat ka fareb

yun to samjhe jis qadar samjha gaya

hum sar-e-rah-e-wafa sunte rahe

kah gaya apni si har aaya gaya

aane wala tha andhera raat ka

sham hote dur tak saya gaya

waza-e-KHuddari nibahi to magar

ai 'raza' danton pasina aa gaya