raat hai raqs-kunan ek ghazal ho jae

raat hai raqs-kunāñ ek ġhazal ho jaa.e

ai mirī tab'-e-ravāñ ek ġhazal ho jaa.e

nabz-e-kaunain dhaḌaktī hai har ik zarre meñ

vajd meñ haiñ dil-o-jāñ ek ġhazal ho jaa.e

jalva-e-yār se mā'mūr hai 'ālam kī fazā

ḳhūb-sūrat hai samāñ ek ġhazal ho jaa.e

kitnī yādeñ haiñ jo tanhā.ī meñ lau dene lagīñ

ai mire soz-e-nihāñ ek ġhazal ho jaa.e

barbat-e-dil pe hai mizrāb-e-zamāñ naġhma-fashāñ

dard hotā hai javāñ ek ġhazal ho jaa.e

baḳhshiye jazb-e-mohabbat ko suḳhan kā paikar

hāl-e-dil yuuñ ho bayāñ ek ġhazal ho jaa.e

jumbish-e-lab se hī iz.hār-e-tamannā kyoñ ho

ḳhāma ban jaa.e zabāñ ek ġhazal ho jaa.e

phir taqāza hai sar-e-bazm ġhazal pesh karūñ

ḳhātir-e-lāla-ruḳhāñ ek ġhazal ho jaa.e

shorish-e-vaqt ne ehsās ko majrūh kiyā

lamha lamha hai girāñ ek ġhazal ho jaa.e

tū shanāsā-e-haqīqat hai to andāz badal

tā-ba-kai vahm-o-gumāñ ek ġhazal ho jaa.e

kaif-e-nāqūs-o-azāñ bol uThe lafzoñ meñ

vird-e-haq ho ba-zabāñ ek ġhazal ho jaa.e

raat hai raqs-kunan ek ghazal ho jae

ai meri tab'-e-rawan ek ghazal ho jae

nabz-e-kaunain dhaDakti hai har ek zarre mein

wajd mein hain dil-o-jaan ek ghazal ho jae

jalwa-e-yar se ma'mur hai 'alam ki faza

KHub-surat hai saman ek ghazal ho jae

kitni yaaden hain jo tanhai mein lau dene lagin

ai mere soz-e-nihan ek ghazal ho jae

barbat-e-dil pe hai mizrab-e-zaman naghma-fashan

dard hota hai jawan ek ghazal ho jae

baKHshiye jazb-e-mohabbat ko suKHan ka paikar

haal-e-dil yun ho bayan ek ghazal ho jae

jumbish-e-lab se hi izhaar-e-tamanna kyon ho

KHama ban jae zaban ek ghazal ho jae

phir taqaza hai sar-e-bazm ghazal pesh karun

KHatir-e-lala-ruKHan ek ghazal ho jae

shorish-e-waqt ne ehsas ko majruh kiya

lamha lamha hai giran ek ghazal ho jae

tu shanasa-e-haqiqat hai to andaz badal

ta-ba-kai wahm-o-guman ek ghazal ho jae

kaif-e-naqus-o-azan bol uThe lafzon mein

wird-e-haq ho ba-zaban ek ghazal ho jae