raat karta tha wo ek murgh-e-giraftar se bahs

raat kartā thā vo ik murġh-e-giraftār se bahs

maiñ bhī tā-sub.h rakhī bulbul-e-gulzār se bahs

nau-bahārāñ meñ vo ho jaave hai kyuuñ surḳh magar

dāġh-e-dil ko hai mire lāla-e-kuhsār se bahs

tālib-ilm-e-mohabbat jo maiñ thā tiflī meñ

thī nit āñkhoñ kī mire husn-e-ruḳh-e-yār se bahs

sulh-e-kul meñ mirī guzre hai mohabbat ke biich

na to takrār hai kāfir se na dīñ-dār se bahs

sau zabāñ go huiiñ muñh meñ tire ai ġhuncha-e-gul

tujh ko lāzim nahīñ karnā mirī minqār se bahs

sheva har-chand ki apnā nahīñ tālib-ilmī

to bhī maujūd haiñ ham karne ko do-chār se bahs

yuuñ huī haar gale kā mire vo nargis-e-mast

juuñ kare raah meñ koī kisī hoshiyār se bahs

hoñ vo dīvāna ki ik shab bhī jo maiñ ghar meñ rahūñ

raat ko sub.h karūñ kar dar-o-dīvār se bahs

aql-e-kul ne nahīñ ilzām diyā us ko husūd

duur ho, kar na abas 'mus.hafī'-e-zār se bahs

raat karta tha wo ek murgh-e-giraftar se bahs

main bhi ta-subh rakhi bulbul-e-gulzar se bahs

nau-bahaaran mein wo ho jawe hai kyun surKH magar

dagh-e-dil ko hai mere lala-e-kuhsar se bahs

talib-ilm-e-mohabbat jo main tha tifli mein

thi nit aankhon ki mere husn-e-ruKH-e-yar se bahs

sulh-e-kul mein meri guzre hai mohabbat ke bich

na to takrar hai kafir se na din-dar se bahs

sau zaban go huin munh mein tere ai ghuncha-e-gul

tujh ko lazim nahin karna meri minqar se bahs

shewa har-chand ki apna nahin talib-ilmi

to bhi maujud hain hum karne ko do-chaar se bahs

yun hui haar gale ka mere wo nargis-e-mast

jun kare rah mein koi kisi hoshiyar se bahs

hon wo diwana ki ek shab bhi jo main ghar mein rahun

raat ko subh karun kar dar-o-diwar se bahs

aql-e-kul ne nahin ilzam diya us ko husud

dur ho, kar na abas 'mushafi'-e-zar se bahs