raat ke andhe darichon ko munawwar dekhte

raat ke andhe darīchoñ ko munavvar dekhte

ham khulī āñkhoñ se jo ḳhvāboñ ke manzar dekhte

band rakkhe ḳhud hamīñ ne jab sabhī dīvār-o-dar

kis tarah phir jhāñk kar us ghar ke andar dekhte

kab hamāre haath aa.iiñ ḳhvāhishoñ kī titliyāñ

'umr guzrī bas yūñhī rañgoñ ke paikar dekhte

mauja-e-tūfāñ meñ utre ahl-e-dil be-iḳhtiyār

sāhiloñ par rah ga.e saare shanāvar dekhte

zindagī kī gahmā-gahmī ne ye fursat hī na dī

ham hathelī par likhā apnā muqaddar dekhte

sāhiloñ kī ret hī se chun rahe ho sīpiyāñ

tum kabhī 'akram' samundar meñ utar kar dekhte

raat ke andhe darichon ko munawwar dekhte

hum khuli aankhon se jo KHwabon ke manzar dekhte

band rakkhe KHud hamin ne jab sabhi diwar-o-dar

kis tarah phir jhank kar us ghar ke andar dekhte

kab hamare hath aain KHwahishon ki titliyan

'umr guzri bas yunhi rangon ke paikar dekhte

mauja-e-tufan mein utre ahl-e-dil be-iKHtiyar

sahilon par rah gae sare shanawar dekhte

zindagi ki gahma-gahmi ne ye fursat hi na di

hum hatheli par likha apna muqaddar dekhte

sahilon ki ret hi se chun rahe ho sipiyan

tum kabhi 'akram' samundar mein utar kar dekhte