raat ke jangal mein koi rasta milta nahin

raat ke jañgal meñ koī rāsta miltā nahīñ

aisā uljhā huuñ ki ab apnā sirā miltā nahīñ

chup haiñ ab saare darīche band haiñ saare kivāḌ

aur kisī dīvār par koī diyā miltā nahīñ

iztirāb-e-ārzū kā saath deñ to kis tarah

dil purānā ho chukā hai aur nayā miltā nahīñ

jaane kis dariyā se ḳhushbū bāñdh kar laatī hai ye

dekhiye to jāda-e-mauj-e-sabā miltā nahīñ

mun.akis kartā hai jaane kaun merī hairateñ

aa.ine ko toḌ kar bhī aa.ina miltā nahīñ

band hote jā rahe haiñ vāpsī ke rāste

lauT kar dekhūñ to koī naqsh-e-pā miltā nahīñ

maan lo 'armān' ab ḳhushbū ke rishte mar ga.e

ab kisī gul ko kisī gul kā patā miltā nahīñ

raat ke jangal mein koi rasta milta nahin

aisa uljha hun ki ab apna sira milta nahin

chup hain ab sare dariche band hain sare kiwaD

aur kisi diwar par koi diya milta nahin

iztirab-e-arzu ka sath den to kis tarah

dil purana ho chuka hai aur naya milta nahin

jaane kis dariya se KHushbu bandh kar lati hai ye

dekhiye to jada-e-mauj-e-saba milta nahin

munakis karta hai jaane kaun meri hairaten

aaine ko toD kar bhi aaina milta nahin

band hote ja rahe hain wapsi ke raste

lauT kar dekhun to koi naqsh-e-pa milta nahin

man lo 'arman' ab KHushbu ke rishte mar gae

ab kisi gul ko kisi gul ka pata milta nahin