raat lambi bhi hai aur tarik bhi shab-guzari ka saman karo dosto

raat lambī bhī hai aur tārīk bhī shab-guzārī kā sāmāñ karo dosto

jaane phir kab ye milnā muqaddar meñ ho apnī apnī kahānī kaho dosto

kis parī-chehra se pyaar tum ne kiyā kaun se des ke shāhzāde ho tum

apnī rūdād-e-ulfat sunā kar baham dāstāñ koī tashkīl do dosto

mujh ko ehsās hai tum bhī merī tarah jān-o-dil kū-e-ulfat meñ haar aa.e ho

ab ye baazī na.e sar se mumkin nahīñ apnā anjām ḳhud soch lo dosto

sub.h hogī to zālim zamāne ke ġham tum pe abr-e-sitam ban ke chhā jā.eñge

fursat-e-bazm-e-shab se ghaḌī-do-ghaḌī baat aapas kī koī karo dosto

Dhal ga.ī raat taare bikharne lage muntashir ho chale dhyān ke silsile

koī dam aur dil meñ farozāñ raho ek muddat ke ba.ad aa.e ho dosto

raat lambi bhi hai aur tarik bhi shab-guzari ka saman karo dosto

jaane phir kab ye milna muqaddar mein ho apni apni kahani kaho dosto

kis pari-chehra se pyar tum ne kiya kaun se des ke shahzade ho tum

apni rudad-e-ulfat suna kar baham dastan koi tashkil do dosto

mujh ko ehsas hai tum bhi meri tarah jaan-o-dil ku-e-ulfat mein haar aae ho

ab ye bazi nae sar se mumkin nahin apna anjam KHud soch lo dosto

subh hogi to zalim zamane ke gham tum pe abr-e-sitam ban ke chha jaenge

fursat-e-bazm-e-shab se ghaDi-do-ghaDi baat aapas ki koi karo dosto

Dhal gai raat tare bikharne lage muntashir ho chale dhyan ke silsile

koi dam aur dil mein farozan raho ek muddat ke baad aae ho dosto