raat main shana-e-idrak se lag kar soya

raat maiñ shāna-e-idrāk se lag kar soyā

band kī aañkh to aflāk se lag kar soyā

ūñghtā thā kahīñ mehrāb kī sarshārī meñ

ik diyā sā kisī chaqmāq se lag kar soyā

ek jaltā huā aañsū jo nahīñ sotā thā

der tak dīda-e-namnāk se lag kar soyā

an-ginat āñkheñ mire jism pe chuñdhyā.ī rahīñ

buqa-e-nūr mirī ḳhaak se lag kar soyā

kūza-gar ne mire baare meñ ye daftar meñ likhā

chaak se utrā magar chaak se lag kar soyā

niiñd kī shart thī tanhā nahīñ sonā mujh ko

hijr thā so usī saffāk se lag kar soyā

raat kāñToñ pe guzārī to savere sochā

kis liye ḳhema-e-ushshāq se lag kar soyā

niiñd suulī pe chalī aa.ī sau zaḳhm-e-uryāñ

apnī ik ḳhvāhish-e-poshāk se lag kar soyā

raat main shana-e-idrak se lag kar soya

band ki aankh to aflak se lag kar soya

unghta tha kahin mehrab ki sarshaari mein

ek diya sa kisi chaqmaq se lag kar soya

ek jalta hua aansu jo nahin sota tha

der tak dida-e-namnak se lag kar soya

an-ginat aankhen mere jism pe chundhyai rahin

buqa-e-nur meri KHak se lag kar soya

kuza-gar ne mere bare mein ye daftar mein likha

chaak se utra magar chaak se lag kar soya

nind ki shart thi tanha nahin sona mujh ko

hijr tha so usi saffak se lag kar soya

raat kanTon pe guzari to sawere socha

kis liye KHema-e-ushshaq se lag kar soya

nind suli pe chali aai sau zaKHm-e-uryan

apni ek KHwahish-e-poshak se lag kar soya