raat raushan na hui kahkashan hote hue

raat raushan na huī kāhkashāñ hote hue

maiñ bhī lau de na sakā shola-e-jāñ hote hue

kar liyā jazb mirā duur kināroñ ne vajūd

mauj-e-dariyā na banā jū-e-ravāñ hote hue

kyuuñ girāñ-bār hai ehsās pe tanhā.ī kī sub.h

paas mere tire hone kā gumāñ hote hue

ye bhī mumkin hai ki maiñ jañg meñ fāteh Thahrūñ

tere qabze meñ mere tiir o kamāñ hote hue

jab ki be-rañg rahe baaġh bahāroñ meñ 'shahāb'

tere jañgal meñ khile phuul ḳhizāñ hote hue

raat raushan na hui kahkashan hote hue

main bhi lau de na saka shola-e-jaan hote hue

kar liya jazb mera dur kinaron ne wajud

mauj-e-dariya na bana ju-e-rawan hote hue

kyun giran-bar hai ehsas pe tanhai ki subh

pas mere tere hone ka guman hote hue

ye bhi mumkin hai ki main jang mein fateh Thahrun

tere qabze mein mere tir o kaman hote hue

jab ki be-rang rahe bagh bahaaron mein 'shahab'

tere jangal mein khile phul KHizan hote hue