raaton ke andheron mein ye log ajab nikle

rātoñ ke añdheroñ meñ ye log ajab nikle

sab nām-o-nasab vaale be-nām-o-nasab nikle

ta.amīr-pasandī ne kuchh ziist par uksāyā

kuchh maut ke sāmāñ bhī jiine kā sab nikle

ye nuur ke saudāgar ḳhud nuur se aarī haiñ

gardūñ pe mah-o-anjum tanvīr-talab nikle

ye dasht ye sahrā sab vīrān haiñ barsoñ se

is samt bhī dīvāna takbīr ba-lab nikle

tahzīb kī bebākī aisī to na thī pahle

ham jab bhī kahīñ nikle tā-hadd-e-adab nikle

taskīñ ke liye ham ne jin se bhī guzārish kī

ham se bhī ziyāda vo taskīn-talab nikle

hastī kī masāfat meñ apnā jinheñ samjhā thā

jab vaqt paḌā 'farhat' vo mohr-ba-lab nikle

raaton ke andheron mein ye log ajab nikle

sab nam-o-nasab wale be-nam-o-nasab nikle

tamir-pasandi ne kuchh zist par uksaya

kuchh maut ke saman bhi jine ka sab nikle

ye nur ke saudagar KHud nur se aari hain

gardun pe mah-o-anjum tanwir-talab nikle

ye dasht ye sahra sab viran hain barson se

is samt bhi diwana takbir ba-lab nikle

tahzib ki bebaki aisi to na thi pahle

hum jab bhi kahin nikle ta-hadd-e-adab nikle

taskin ke liye hum ne jin se bhi guzarish ki

hum se bhi ziyaada wo taskin-talab nikle

hasti ki masafat mein apna jinhen samjha tha

jab waqt paDa 'farhat' wo mohr-ba-lab nikle