raaz dil ka yun khula qirtas par

raaz dil kā yuuñ khulā qirtās par

ek aañsū gir gayā qirtās par

ik bharam thā yuuñ zabāñ na khul sakī

aur sab kuchh kah diyā qirtās par

sach ko dekhā lafz gūñge ho ga.e

kis tarah detī sadā qirtās par

thiiñ mulāqāteñ bhī kāġhaz kī tarah

ho rahā hai fāsla qirtās par

merī rūdād-e-ġham-e-ulfat sunī

aur qalam bhī ro diyā qirtās par

aane vāloñ ke jigar chhalnī na hoñ

likh do aisā falsafa qirtās par

lafz sadiyoñ se rahe nauha-kunāñ

vaqt se maiñ ne kahā qirtās par

ḳhāmushī kī chīḳh thī lafzoñ meñ aur

dard ne sab kah diyā qirtās par

ḳhud likhā aur ḳhud hī ḳhud ko paḌh liyā

mil gayā hai rāsta qirtās par

bas haqīqat thī qalam thā haath meñ

ho gayā sab aa.ina qirtās par

tū ne bhī duniyā se muñh moḌā 'nasīm'

aur qalam bhī chal diyā qirtās par

raaz dil ka yun khula qirtas par

ek aansu gir gaya qirtas par

ek bharam tha yun zaban na khul saki

aur sab kuchh kah diya qirtas par

sach ko dekha lafz gunge ho gae

kis tarah deti sada qirtas par

thin mulaqaten bhi kaghaz ki tarah

ho raha hai fasla qirtas par

meri rudad-e-gham-e-ulfat suni

aur qalam bhi ro diya qirtas par

aane walon ke jigar chhalni na hon

likh do aisa falsafa qirtas par

lafz sadiyon se rahe nauha-kunan

waqt se main ne kaha qirtas par

KHamushi ki chiKH thi lafzon mein aur

dard ne sab kah diya qirtas par

KHud likha aur KHud hi KHud ko paDh liya

mil gaya hai rasta qirtas par

bas haqiqat thi qalam tha hath mein

ho gaya sab aaina qirtas par

tu ne bhi duniya se munh moDa 'nasim'

aur qalam bhi chal diya qirtas par