raaz-e-gham kyunkar chhapaun dil mein gham ka josh hai

rāz-e-ġham kyūñkar chhapā.ūñ dil meñ ġham kā josh hai

qatra-qatra ashk-e-ḳhūñ kā nāla-e-ḳhāmosh hai

jalva-e-zebā-e-sāqī sad-chaman bar-dosh hai

sāġhar-e-mai lāla-sāmāñ hai subū gul-posh hai

vasl kī shab se tamannāoñ kā dil meñ josh hai

ranj bhī hai aish-sāmāñ ġham bhī ishrat-kosh hai

anjuman-ārā-e-ālam haiñ majāzī sūrateñ

jalva-e-husn-e-haqīqat aaj tak rū-posh hai

chashm-e-maigūñ ne bharī mahfil ko be-ḳhud kar diyā

kaun le ab jām-e-sahbā kis ko itnā hosh hai

ḳhud nigāh-e-shauq hai josh-e-mohabbat kā subūt

parda-dār-e-rāz go apnā lab-e-ḳhāmosh hai

kis ne aate hī bharī mahfil meñ ulTī hai naqāb

har dar-o-dīvār goyā ā.ina-bar-dosh hai

ik tilism-e-rāz hai saaqī kī chashm-e-sehr-sāz

ahl-e-dil ko be-ḳhudī ahl-e-havas ko hosh hai

kis qadar dilkash hai ye kaif-e-mohabbat kā samāñ

ishq bhī sarshār hai aur husn bhī mad.hosh hai

kyā ḳhabar āñkhoñ ne kyā dekhā harīm-e-nāz meñ

ek bijlī kauñd jaatī thī bas itnā hosh hai

tār-e-dāman ko mire nāseh hiqārat se na dekh

ahd-e-vahshat kā yahī afsāna-e-ḳhāmosh hai

khol de ai chashm-e-maigūñ ahl-e-mahfil kā bharam

kis ko kitnī be-ḳhudī hai kis ko kitnā hosh hai

ek muddat par huā hai aaj un kā sāmnā

aañkh sab kuchh kah rahī hai go zabāñ ḳhāmosh hai

rāt-bhar jis ke liye rahtī thiiñ nīñdeñ be-qarār

ab vahī jān-e-tamannā zīnat-e-āġhosh hai

mai kī sarmastī tire sheroñ meñ paatā huuñ 'valī'

tū magar shaidā-e-rang-e-'ġhālib'-e-mai-nosh hai

raaz-e-gham kyunkar chhapaun dil mein gham ka josh hai

qatra-qatra ashk-e-KHun ka nala-e-KHamosh hai

jalwa-e-zeba-e-saqi sad-chaman bar-dosh hai

saghar-e-mai lala-saman hai subu gul-posh hai

wasl ki shab se tamannaon ka dil mein josh hai

ranj bhi hai aish-saman gham bhi ishrat-kosh hai

anjuman-ara-e-alam hain majazi suraten

jalwa-e-husn-e-haqiqat aaj tak ru-posh hai

chashm-e-maigun ne bhari mahfil ko be-KHud kar diya

kaun le ab jam-e-sahba kis ko itna hosh hai

KHud nigah-e-shauq hai josh-e-mohabbat ka subut

parda-dar-e-raaz go apna lab-e-KHamosh hai

kis ne aate hi bhari mahfil mein ulTi hai naqab

har dar-o-diwar goya aaina-bar-dosh hai

ek tilism-e-raaz hai saqi ki chashm-e-sehr-saz

ahl-e-dil ko be-KHudi ahl-e-hawas ko hosh hai

kis qadar dilkash hai ye kaif-e-mohabbat ka saman

ishq bhi sarshaar hai aur husn bhi madhosh hai

kya KHabar aankhon ne kya dekha harim-e-naz mein

ek bijli kaund jati thi bas itna hosh hai

tar-e-daman ko mere naseh hiqarat se na dekh

ahd-e-wahshat ka yahi afsana-e-KHamosh hai

khol de ai chashm-e-maigun ahl-e-mahfil ka bharam

kis ko kitni be-KHudi hai kis ko kitna hosh hai

ek muddat par hua hai aaj un ka samna

aankh sab kuchh kah rahi hai go zaban KHamosh hai

raat-bhar jis ke liye rahti thin ninden be-qarar

ab wahi jaan-e-tamanna zinat-e-aghosh hai

mai ki sarmasti tere sheron mein pata hun 'wali'

tu magar shaida-e-rang-e-'ghaalib'-e-mai-nosh hai