raazdar-e-dil-e-betab hua karta hai

rāzdār-e-dil-e-betāb huā kartā hai

ashk ganjīna-e-nāyāb huā kartā hai

go na saaqī hai na mahfil hai magar zindāñ meñ

der tak zikr-e-mai-e-nāb huā kartā hai

talḳh hotī to haiñ ġhairoñ kī jafā.eñ lekin

talḳh-tar ta.ana-e-ahbāb huā kartā hai

fikr-e-ārā.ish-e-gulshan se junūñ hai āzād

hosh jāñ-dāda-e-asbāb huā kartā hai

merī duniyā-e-mohabbat meñ sukūn-e-sāhil

nazr-e-jaulānī-e-girdāb huā kartā hai

ashk-e-ḳhuddār jo sharminda na ho dāman se

rashk-e-sad-gauhar-e-ḳhush-āb huā kartā hai

nuur jo ḳhaak ke zarroñ ko daraḳhshānī de

faḳhr-e-ḳhurshīd-e-jahāñ-tāb huā kartā hai

raazdar-e-dil-e-betab hua karta hai

ashk ganjina-e-nayab hua karta hai

go na saqi hai na mahfil hai magar zindan mein

der tak zikr-e-mai-e-nab hua karta hai

talKH hoti to hain ghairon ki jafaen lekin

talKH-tar tana-e-ahbab hua karta hai

fikr-e-araish-e-gulshan se junun hai aazad

hosh jaan-dada-e-asbab hua karta hai

meri duniya-e-mohabbat mein sukun-e-sahil

nazr-e-jaulani-e-girdab hua karta hai

ashk-e-KHuddar jo sharminda na ho daman se

rashk-e-sad-gauhar-e-KHush-ab hua karta hai

nur jo KHak ke zarron ko daraKHshani de

faKHr-e-KHurshid-e-jahan-tab hua karta hai