rabt-e-ehsas kahan ab dil-e-nakaam ke sath

rabt-e-ehsās kahāñ ab dil-e-nākām ke saath

kyoñ bujhā jaatā hai ye tīrgi-e-shām ke saath

kyā ḳhabar un kā pata paa.e na paa.e ye bhī

maiñ to chalne ko chalūñ gardish-e-ayyām ke saath

ab to vo bhī nahīñ jo de mujhe do lamhe sukūñ

dil meñ jo dard sā rahtā thā tire naam ke saath

kaun jaane ki kahāñ hogā vo ālām-talab

dil ko dekhā to thā TuuTe hue asnām ke saath

hāl-e-dil jaane vo kis rang meñ ta.abīr kareñ

chand aañsū bhī ga.e haiñ mire paiġhām ke saath

sochtā huuñ ki lagā.ūñgā kise apne gale

be-ḳhudī aa.ī agar talḳhī-e-ālām ke saath

laakh TuuTā ho 'sabā' lab se lagā lo apne

rūh-e-mai-ḳhāna khīñchī aatī ho jis jaam ke saath

rabt-e-ehsas kahan ab dil-e-nakaam ke sath

kyon bujha jata hai ye tirgi-e-sham ke sath

kya KHabar un ka pata pae na pae ye bhi

main to chalne ko chalun gardish-e-ayyam ke sath

ab to wo bhi nahin jo de mujhe do lamhe sukun

dil mein jo dard sa rahta tha tere nam ke sath

kaun jaane ki kahan hoga wo aalam-talab

dil ko dekha to tha TuTe hue asnam ke sath

haal-e-dil jaane wo kis rang mein tabir karen

chand aansu bhi gae hain mere paigham ke sath

sochta hun ki lagaunga kise apne gale

be-KHudi aai agar talKHi-e-alam ke sath

lakh TuTa ho 'saba' lab se laga lo apne

ruh-e-mai-KHana khinchi aati ho jis jam ke sath