rabt-e-pinhan ki sadaqat hai na milna tera

rabt-e-pinhāñ kī sadāqat hai na milnā terā

tere milne hī kī sūrat hai na milnā terā

kyuuñ mirā shauq-e-farāvāñ hai ba-har lamha fuzūñ

kyā koī rāz-e-mashiyyat hai na milnā terā

lāla-o-gul mah-o-anjum se gila hai kyā kyā

aur maqsūd-e-shikāyat hai na milnā terā

kisī sūrat kisī unvāñ se talāfī na huī

kis qadar talḳh haqīqat hai na milnā terā

zindagī ne tire milne kā bahāna samjhā

varna dar-asl qayāmat hai na milnā terā

phir bhī tere liye āvāra-e-ġhurbat hai 'ravish'

garche shāyān-e-mohabbat hai na milnā terā

rabt-e-pinhan ki sadaqat hai na milna tera

tere milne hi ki surat hai na milna tera

kyun mera shauq-e-farawan hai ba-har lamha fuzun

kya koi raaz-e-mashiyyat hai na milna tera

lala-o-gul mah-o-anjum se gila hai kya kya

aur maqsud-e-shikayat hai na milna tera

kisi surat kisi unwan se talafi na hui

kis qadar talKH haqiqat hai na milna tera

zindagi ne tere milne ka bahana samjha

warna dar-asl qayamat hai na milna tera

phir bhi tere liye aawara-e-ghurbat hai 'rawish'

garche shayan-e-mohabbat hai na milna tera