rabt kaisa tha dil-o-dida-o-jaan mein pahle

rabt kaisā thā dil-o-dīda-o-jāñ meñ pahle

thā koī aur jahāñ apne jahāñ meñ pahle

dil dhaḌaktā hai to rone kī sadā aatī hai

ek hañgāma sā rahtā thā makāñ meñ pahle

ḳhaak sī uḌtī hai siine meñ yaqīñ ke har dam

qāfile aa ke Thaharte the gumāñ meñ pahle

yak-ba-yak dil se chhalak paḌtī thī ik mauj-e-tarab

lazzat-e-jāñ thī ajab shorish-e-jāñ meñ pahle

ab taraddud hai ta.ammul hai ta.assuf hai tamām

taab thī ġham meñ tamannā thī fuġhāñ meñ pahle

ab jo hai garmī-e-bāzār to ham is meñ nahīñ

ham bhī the garmī-e-bāzār jahāñ meñ pahle

lahlahātā hai jo qāmat meñ qayāmat kā chaman

ye sajāvaT to na thī sarv-e-ravāñ meñ pahle

saf-ba-saf bandish-e-ā'zā kā barahna cham-o-ḳham

aisī yūrish bhī na dekhī thī jahāñ meñ pahle

ye kashish kab thī bhalā kāf-e-karam meñ ki jo hai

ye tapish kab thī bhalā rū-e-butāñ meñ pahle

rabt kaisa tha dil-o-dida-o-jaan mein pahle

tha koi aur jahan apne jahan mein pahle

dil dhaDakta hai to rone ki sada aati hai

ek hangama sa rahta tha makan mein pahle

KHak si uDti hai sine mein yaqin ke har dam

qafile aa ke Thaharte the guman mein pahle

yak-ba-yak dil se chhalak paDti thi ek mauj-e-tarab

lazzat-e-jaan thi ajab shorish-e-jaan mein pahle

ab taraddud hai tammul hai tassuf hai tamam

tab thi gham mein tamanna thi fughan mein pahle

ab jo hai garmi-e-bazar to hum is mein nahin

hum bhi the garmi-e-bazar jahan mein pahle

lahlahata hai jo qamat mein qayamat ka chaman

ye sajawaT to na thi sarw-e-rawan mein pahle

saf-ba-saf bandish-e-a'za ka barahna cham-o-KHam

aisi yurish bhi na dekhi thi jahan mein pahle

ye kashish kab thi bhala kaf-e-karam mein ki jo hai

ye tapish kab thi bhala ru-e-butan mein pahle