rabt shishe se talluq hai na kuchh jam ke sath

rabt shīshe se ta.alluq hai na kuchh jaam ke saath

nisbateñ jab se huiiñ dil ko tire naam ke saath

zindagī ajnabī jazbāt kā ik sangam hai

kaif-e-āġhāz bhī hai hasrat-e-anjām ke saath

jām-o-mīnā se alag us meñ hai ik kaif-o-surūr

aao kuchh duur chaleñ gardish-e-ayyām ke saath

zindagī meñ baḌe mafhūm nazar ā.eñge

chand lamhe to guzāro kisī nākām ke saath

shā.erī ā.ina-e-zīst meñ ḳhud-bīnī hai

apnī ik raah alag hai ravish-e-ām ke saath

chārasāzoñ kā na honā baḌī ne.amat hai 'shafīq'

ranj-o-ġham ham ne uThā.e baḌe ārām ke saath

rabt shishe se talluq hai na kuchh jam ke sath

nisbaten jab se huin dil ko tere nam ke sath

zindagi ajnabi jazbaat ka ek sangam hai

kaif-e-aghaz bhi hai hasrat-e-anjam ke sath

jam-o-mina se alag us mein hai ek kaif-o-surur

aao kuchh dur chalen gardish-e-ayyam ke sath

zindagi mein baDe mafhum nazar aaenge

chand lamhe to guzaro kisi nakaam ke sath

shaeri aaina-e-zist mein KHud-bini hai

apni ek rah alag hai rawish-e-am ke sath

chaarasazon ka na hona baDi neamat hai 'shafiq'

ranj-o-gham hum ne uThae baDe aaram ke sath