rafta rafta jazb-e-ulfat mein kamal aa hi gaya

rafta rafta jazb-e-ulfat meñ kamāl aa hī gayā

hijr ke parde se paiġhām-e-visāl aa hī gayā

iztirāb-e-dil ba-shakl-e-rāz āḳhir tā-ba-ke

tishna-e-dīdār ke lab par savāl aa hī gayā

mere dast-e-ārzū meñ laakh nākāmī pe bhī

vo nahīñ to un kā dāmān-e-ḳhayāl aa hī gayā

ye to ab tak phūñk detā hastī-e-kaunain ko

vo to kahiye ishq meñ kuchh e'tidāl aa hī gayā

phuuT hī niklī rag-e-saudā se tanvīr-e-junūñ

zarre zarre meñ bayābāñ ke jamāl aa hī gayā

naqsh dhuñdle ho chuke haiñ sānehāt-e-zīst ke

jaane kyā dekhā ki phir un kā ḳhayāl aa hī gayā

sar pe saudā-e-mohabbat pā-ba-zanjīr-e-junūñ

tere dar par 'vahshī'-e-āshufta-hāl aa hī gayā

rafta rafta jazb-e-ulfat mein kamal aa hi gaya

hijr ke parde se paigham-e-visal aa hi gaya

iztirab-e-dil ba-shakl-e-raaz aaKHir ta-ba-ke

tishna-e-didar ke lab par sawal aa hi gaya

mere dast-e-arzu mein lakh nakaami pe bhi

wo nahin to un ka daman-e-KHayal aa hi gaya

ye to ab tak phunk deta hasti-e-kaunain ko

wo to kahiye ishq mein kuchh e'tidal aa hi gaya

phuT hi nikli rag-e-sauda se tanwir-e-junun

zarre zarre mein bayaban ke jamal aa hi gaya

naqsh dhundle ho chuke hain sanehat-e-zist ke

jaane kya dekha ki phir un ka KHayal aa hi gaya

sar pe sauda-e-mohabbat pa-ba-zanjir-e-junun

tere dar par 'wahshi'-e-ashufta-haal aa hi gaya