rah-e-hasti mein ek aisa bhi maqam aata hai

rah-e-hastī meñ ik aisā bhī maqām aatā hai

be-irāda hī zabāñ par koī naam aatā hai

dil samajh kar maiñ uThā letā huuñ reza-reza

TuuT jaatā hai jo sāġhar mire kaam aatā hai

roz kuchh shaġhl nikal aatā hai dīvāne kā

roz kuchh kū-e-malāmat se payām aatā hai

pā-ba-zanjīr sahī ābla-pā.ī kā junūñ

har nafas tazkira-e-manzil-o-gām aatā hai

faash jab hotā hai rāz-e-hunar-e-sayyādī

ik nayā silsila-e-dāna-o-dām aatā hai

dil machal jaatā hai ik shāhid-e-mahmil ke liye

husn-e-bebāk to aksar lab-e-bām aatā hai

rah-e-hasti mein ek aisa bhi maqam aata hai

be-irada hi zaban par koi nam aata hai

dil samajh kar main uTha leta hun reza-reza

TuT jata hai jo saghar mere kaam aata hai

roz kuchh shaghl nikal aata hai diwane ka

roz kuchh ku-e-malamat se payam aata hai

pa-ba-zanjir sahi aabla-pai ka junun

har nafas tazkira-e-manzil-o-gam aata hai

fash jab hota hai raaz-e-hunar-e-sayyaadi

ek naya silsila-e-dana-o-dam aata hai

dil machal jata hai ek shahid-e-mahmil ke liye

husn-e-bebak to aksar lab-e-baam aata hai