rah-e-hayat ki khoi hui sada ban jae

rah-e-hayāt kī khoī huī sadā ban jaa.e

hujūm-e-ġham meñ koī ho jo aasrā ban jaa.e

ye kārvān-e-mohabbat hai ai ḳhirad-mando

samundaroñ se bhī guzre to rāsta ban jaa.e

zabāñ pe zikr usī kā ho roz-o-shab kyūñ-kar

na chāhiye use itnā ki vo ḳhudā ban jaa.e

ulajh ke rah sā gayā huuñ tire ḳhayāloñ meñ

ki ik ḳhayāl miTā.ūñ to dūsrā ban jaa.e

phir us ke ba.ad hunar terā mo'atabar hogā

tarāsh sang kuchh aise ki aa.ina ban jaa.e

hazar ki ashk na chhalke nigāh se 'anvar'

ruḳh-e-sitam na kahīñ dard-āshnā ban jaa.e

rah-e-hayat ki khoi hui sada ban jae

hujum-e-gham mein koi ho jo aasra ban jae

ye karwan-e-mohabbat hai ai KHirad-mando

samundaron se bhi guzre to rasta ban jae

zaban pe zikr usi ka ho roz-o-shab kyun-kar

na chahiye use itna ki wo KHuda ban jae

ulajh ke rah sa gaya hun tere KHayalon mein

ki ek KHayal miTaun to dusra ban jae

phir us ke baad hunar tera mo'atabar hoga

tarash sang kuchh aise ki aaina ban jae

hazar ki ashk na chhalke nigah se 'anwar'

ruKH-e-sitam na kahin dard-ashna ban jae