rah-e-hayat pe yun bach ke chal raha hun main

rah-e-hayāt pe yuuñ bach ke chal rahā huuñ maiñ

ki khaa.e Thokareñ koī sañbhal rahā huuñ maiñ

tafakkurāt ke īñdhan meñ jal rahā huuñ maiñ

ba-shakl-e-barf isī se pighal rahā huuñ maiñ

barā-e-raushnī sūraj bikher de kirneñ

zamīñ pe terī tamāzat se jal rahā huuñ maiñ

na zād-e-rāh na manzil kā hai pata mujh ko

safar tavīl hai ghar se nikal rahā huuñ maiñ

har ek daur ne baḌh kar mujhe salām kiyā

kharā huuñ qīmtī sikka huuñ chal rahā huuñ maiñ

balā se manzileñ mujh ko milīñ milīñ na milīñ

kisī ke naqsh-e-qadam par to chal rahā huuñ meñ

diyā hai dars jinheñ maiñ ne dard-mandī kā

unhīñ kī nazroñ meñ 'maqsūd' khal rahā huuñ maiñ

rah-e-hayat pe yun bach ke chal raha hun main

ki khae Thokaren koi sanbhal raha hun main

tafakkuraat ke indhan mein jal raha hun main

ba-shakl-e-barf isi se pighal raha hun main

bara-e-raushni suraj bikher de kirnen

zamin pe teri tamazat se jal raha hun main

na zad-e-rah na manzil ka hai pata mujh ko

safar tawil hai ghar se nikal raha hun main

har ek daur ne baDh kar mujhe salam kiya

khara hun qimti sikka hun chal raha hun main

bala se manzilen mujh ko milin milin na milin

kisi ke naqsh-e-qadam par to chal raha hun mein

diya hai dars jinhen main ne dard-mandi ka

unhin ki nazron mein 'maqsud' khal raha hun main